ಶ್ರೀ ಸುತ್ತೂರು ಮಠ - ಮೈಸೂರು ಮತ್ತು ಚಾಮರಾಜನಗರ ಜಿಲ್ಲಾ ವೀರಶೈವ/ಲಿಂಗಾಯತ ಮಠಾಧಿಪತಿಗಳ ಗೋಷ್ಠಿ (ರಿ)

ವಿಳಾಸ:

ಜಗದ್ಗುರು ಶ್ರೀ ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳವರು, ಶ್ರೀ ಸುತ್ತೂರು ಮಠ, ಚಾಮುಂಡಿ ಬೆಟ್ಟದ ತಪ್ಪಲು, ಮೈಸೂರು – 570004

ಮಠದ ವಿವರ:

ಜಗದ್ಗುರು ಶ್ರೀ ವೀರಸಿಂಹಾಸನ ಮಹಾಸಂಸ್ಥಾನ ಮಠ, ಸುತ್ತೂರು ಶ್ರೀಕ್ಷೇತ್ರ

ಕಪಿಲಾ ನದಿಯ ಬಲದಂಡೆಯಲ್ಲಿರುವ ಸುತ್ತೂರು ಇತಿಹಾಸ ಪ್ರಸಿದ್ಧ ಕ್ಷೇತ್ರ. ಹಿಂದೆ ಸುತ್ತೂರಿಗೆ ಶ್ರೋತ್ರಿಯೂರು ಮತ್ತು ಪ್ರದಕ್ಷಿಣಪುರ ಎಂಬ ಹೆಸರುಗಳಿದ್ದವು. ಇಲ್ಲಿರುವ ಸುತ್ತೂರು ಶ್ರೀಮಠವು ಹತ್ತನೆಯ ಶತಮಾನದಲ್ಲಿಯೇ ಸ್ಥಾಪನೆಯಾದುದೆಂದು ಶಾಸನಗಳಿಂದ ತಿಳಿದುಬರುತ್ತದೆ. “ಸುತ್ತೂರು ಮಠ” ಎಂದೇ ಜನಮಾನಸದಲ್ಲಿ ಪರಿಚಿತವಾಗಿರುವ ಜಗದ್ಗುರು ಶ್ರೀ ವೀರಸಿಂಹಾಸನ ಮಹಾಸಂಸ್ಥಾನ ಮಠವು ಇಂದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಧಾರ್ಮಿಕ, ಆಧ್ಯಾತ್ಮಿಕ, ಶೈಕ್ಷಣಿಕ, ಸಾಂಸ್ಕೃತಿಕ ಹಾಗೂ ಸಾಮಾಜಿಕ ಕ್ಷೇತ್ರಗಳ ಬಹುಮುಖ ಸೇವೆಯಲ್ಲಿ ನಿರತವಾಗಿದೆ. ಚೋಳ ಚಕ್ರವರ್ತಿಯಾದ ರಾಜರಾಜ ಚೋಳ ಮತ್ತು ಗಂಗರ ದೊರೆ ನಾಲ್ಕನೇ ರಾಚಮಲ್ಲನ ಮಧ್ಯೆ ಯುದ್ಧ ನಡೆಯಬೇಕಾಗಿದ್ದ ಸಂದರ್ಭ. ರಾಜರಾಜ ಚೋಳನ ಕುದುರೆಯು ಇದ್ದಕ್ಕಿದ್ದಂತೆ ಕಪಿಲಾ ನದಿಯ ಬಂಡೆಯ ಮೇಲೆ ಧ್ಯಾನಸ್ಥರಾಗಿದ್ದ ಆದಿ ಜಗದ್ಗುರು ಶ್ರೀ ಶಿವರಾತ್ರೀಶ್ವರ ಶಿವಯೋಗಿಗಳವರ ಮುಂದೆ ಬಂದು ನಿಲ್ಲುತ್ತದೆ. ಶಿವಯೋಗಿಗಳು ರಾಜರಾಜ ಚೋಳನಿಗೂ, ರಾಚಮಲ್ಲನಿಗೂ ಯುದ್ಧದಿಂದಾಗುವ ಅನಾಹುತ, ಸಾವು-ನೋವುಗಳ ಬಗ್ಗೆ ಬುದ್ಧಿವಾದ ಹೇಳಿ ಯುದ್ಧವನ್ನು ನಿವಾರಿಸಿ ಅವರ ನಡುವೆ ಸೌಹಾರ್ದತೆ ಮತ್ತು ಶಾಂತಿ ನೆಲೆಸುವಂತೆ ಮಾಡುತ್ತಾರೆ. ಇದರಿಂದ ಪ್ರಭಾವಿತನಾದ ರಾಜರಾಜ ಚೋಳನು ಶಿವಯೋಗಿಗಳನ್ನು ಕಂಚಿಗೆ ಬರುವಂತೆ ಆಹ್ವಾನಿಸುತ್ತಾನೆ. ಆದರೆ, ಶಿವಯೋಗಿಗಳು ಇಲ್ಲಿಯೇ ನೆಲೆಸುವ ಇಚ್ಛೆಯನ್ನು ವ್ಯಕ್ತಪಡಿಸುತ್ತಾರೆ. ಅವರ ದಿವ್ಯ ಸಂಕಲ್ಪದಿಂದ ಸ್ಥಾಪಿತವಾದ ಧಾರ್ಮಿಕ ಶ್ರದ್ಧಾಕೇಂದ್ರವೇ ಸುತ್ತೂರು ಶ್ರೀಮಠ. ಈ ಮಠದ ಗುರುಪರಂಪರೆಯಲ್ಲಿ ಬಂದ 23 ಜನ ಜಗದ್ಗುರುಗಳಿಗೂ ಅಪಾರ ಸಾಮಾಜಿಕ ಕಳಕಳಿಯಿತ್ತು. ಅವರು ಸಮಾಜವನ್ನು ಧರ್ಮ, ಅಧ್ಯಾತ್ಮಗಳ ದಾರಿಯಲ್ಲಿ ಮುನ್ನಡೆಸಿದ್ದಾರೆ. ಪ್ರಸ್ತುತ ಪರಮಪೂಜ್ಯ ಜಗದ್ಗುರು ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳವರ ಕ್ರಿಯಾಶಕ್ತಿ ಮತ್ತು ಲೋಕಾನುಕಂಪೆಯಿಂದ ಶ್ರೀಮಠವು ಅಪಾರ ಖ್ಯಾತಿಯನ್ನು, ಜನಪ್ರೀತಿಯನ್ನು ಗಳಿಸಿದೆ. “ಕಾಯಕವೇ ಕೈಲಾಸ” ತತ್ವದಡಿಯಲ್ಲಿ ಜನಸೇವೆಯಲ್ಲಿ ನಿರತವಾಗಿದೆ. ಶ್ರೀಮಠದ ಚಟುವಟಿಕೆಗಳು ಕರ್ನಾಟಕ ಮತ್ತು ನೆರೆಹೊರೆಯ ರಾಜ್ಯಗಳಲ್ಲದೆ ವಿದೇಶಗಳಲ್ಲೂ ಹಬ್ಬಿವೆ. ಸುತ್ತೂರು ಶ್ರೀಕ್ಷೇತ್ರವು ದೇವಾಲಯಗಳ ಆಗರವಾಗಿರುವುದರ ಜೊತೆಗೆ, ಭಕ್ತರ ಪಾಲಿನ ಆಧ್ಯಾತ್ಮಿಕ ಕೇಂದ್ರವೂ ಆಗಿದೆ. ಬಡಬಗ್ಗರ ಪಾಲಿನ ಆಶಾಕಿರಣವಾಗಿದೆ. ಸಂಸ್ಕೃತಿ, ಸಾಹಿತ್ಯ ಹಾಗೂ ಕಲೆಗಳಿಗೆ ಬೆಂಬಲ ನೀಡುತ್ತಿದೆ. ಜ್ಞಾನ ದಾಸೋಹ, ಅನ್ನದಾಸೋಹ ಮತ್ತು ವಿವಿಧ ಅಭಿವೃದ್ಧಿ ಯೋಜನೆಗಳ ಮೂಲಕ ಸಮಾಜದ ಕಟ್ಟಕಡೆಯ ಮನುಷ್ಯನನ್ನೂ ತಲುಪುತ್ತಿದೆ. ಮಾನವಸೇವೆಯೇ ದೇವರ ಸೇವೆ ಎಂಬ ಧ್ಯೇಯವಾಕ್ಯದಡಿಯಲ್ಲಿ ಇಡೀ ಸಮಾಜದ ಶ್ರೀರಕ್ಷೆಯಾಗಿದೆ.

ಪರಂಪರೆ:

ಈ ಭವ್ಯ ಪರಂಪರೆಯುದ್ದಕ್ಕೂ, ಶ್ರೀಮಠವು 24 ಜನ ಜಗದ್ಗುರುಗಳ ಧೀಮಂತ ನೇತೃತ್ವವನ್ನು ಪಡೆದಿದೆ. ಶ್ರೀಮಠದ ಇಂದಿನ ಎಲ್ಲ ಸಾಧನೆಗಳ ಹಿಂದೆ ಇವರುಗಳ ದಿವ್ಯ ಸಂಕಲ್ಪ ಹಾಗೂ ಅದಮ್ಯ ಚೈತನ್ಯ ಕೆಲಸ ಮಾಡುತ್ತಿದೆ. ಶ್ರೀಮಠದ ಪರಂಪರೆಯ ಜಗದ್ಗುರುಗಳ ವಿವರಗಳು ಹೀಗಿವೆ :

ಆದಿಜಗದ್ಗುರು ಶ್ರೀ ಶಿವರಾತ್ರೀಶ್ವರ ಶಿವಯೋಗಿ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಈಶಾನೇಶ್ವರ ಒಡೆಯರ್ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ನಿಜಲಿಂಗ ಶಿವಾಚಾರ್ಯ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಸಿದ್ಧನಂಜ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಕಪಿನಿ ನಂಜುಂಡ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಚನ್ನವೀರ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಸಿದ್ಧಮಲ್ಲ ಶಿವಾಚಾರ್ಯ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಪರ್ವತೇಂದ್ರ ಶಿವಾಚಾರ್ಯ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಭಂಡಾರಿ ಬಸಪ್ಪ ಒಡೆಯರ್ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಕೂಗಲೂರು ನಂಜುಂಡ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಘನಲಿಂಗ ಶಿವಯೋಗಿ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಇಮ್ಮಡಿ ಶಿವರಾತ್ರೀಶ್ವರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಚನ್ನಬಸವ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಗುರುನಂಜ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಗುರುಚನ್ನಬಸವ ಶಿವಾಚಾರ್ಯ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಗುರುಪಂಚಾಕ್ಷರ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಚಿದ್ಘನ ಶಿವಾಚಾರ್ಯ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಚನ್ನವೀರ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಮಹಾಂತ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಸಿದ್ಧಮಲ್ಲ ಶಿವಾಚಾರ್ಯ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಮಂತ್ರಮಹರ್ಷಿ ಶ್ರೀ ಶಿವರಾತ್ರೀಶ್ವರ ಮಹಾಸ್ವಾಮಿಗಳು
ರಾಜಗುರುತಿಲಕ ಜಗದ್ಗುರು ಡಾ. ಶ್ರೀ ಶಿವರಾತ್ರಿ ರಾಜೇಂದ್ರ ಮಹಾಸ್ವಾಮಿಗಳು
ಜಗದ್ಗುರು ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳವರು (ಪ್ರಸ್ತುತ)

ಪರಮಪೂಜ್ಯ ಜಗದ್ಗುರು ಶ್ರೀ ಘನಲಿಂಗ ಶಿವಯೋಗಿ ಮಹಾಸ್ವಾಮಿಗಳವರು

ಶ್ರೀಮಠದ ೧೧ನೇ ಪೀಠಾಧಿಪತಿಗಳಾಗಿ ೧೫೩೦ರಲ್ಲಿ ಅಧಿಕಾರ ವಹಿಸಿಕೊಂಡರು. ಪ್ರಸಿದ್ಧ ವಚನಕಾರರಾಗಿದ್ದ ಇವರು, ವಚನಸಾಹಿತ್ಯ ಸಂಕಲನದ ನೇತೃತ್ವವನ್ನು ವಹಿಸಿದ್ದ ಶ್ರೀ ತೋಂಟದ ಸಿದ್ಧಲಿಂಗ ಯತಿಗಳವರ ಸಮಕಾಲೀನರು. ಶ್ರೀಮಠದಲ್ಲಿ ಕೆಲವು ವರ್ಷಗಳನ್ನು ಕಳೆದ ನಂತರ ಶ್ರೀ ಸಿದ್ಧಲಿಂಗ ಶಿವಯೋಗಿಗಳೊಂದಿಗೆ ಕರ್ನಾಟಕ ಮತ್ತು ನೆರೆಹೊರೆಯ ರಾಜ್ಯಗಳಲ್ಲಿ ಧರ್ಮಸಂಚಾರ ಕೈಗೊಂಡರು. ಕೊನೆಗೆ ತುಮಕೂರು ಜಿಲ್ಲೆಯ ಕಗ್ಗೆರೆ ಗ್ರಾಮದಲ್ಲಿ ಲಿಂಗೈಕ್ಯರಾಗಿದ್ದು, ಅಲ್ಲಿ ಅವರ ಗದ್ದುಗೆ ಇದೆ.

ಪರಮಪೂಜ್ಯ ಜಗದ್ಗುರು ಮಂತ್ರಮಹರ್ಷಿ ಶ್ರೀ ಶಿವರಾತ್ರೀಶ್ವರ ಮಹಾಸ್ವಾಮಿಗಳವರು

ಶ್ರೀಮಠದ 22ನೇ ಪೀಠಾಧಿಪತಿಗಳಾಗಿ 16ನೇ ವಯಸ್ಸಿನಲ್ಲಿ ಪಟ್ಟವನ್ನು ಅಲಂಕರಿಸಿದರು. ಇವರ ಅವಧಿಯಲ್ಲಿ ಶ್ರೀಮಠದ ಕಾರ್ಯವ್ಯಾಪ್ತಿಯಲ್ಲಿ ಹಲವಾರು ಪ್ರಮುಖ ಬದಲಾವಣೆಗಳಾದವು. ಪೂಜ್ಯರು ಶ್ರೀಮಠದ ಚಟುವಟಿಕೆಗಳನ್ನು ವ್ಯವಸ್ಥಿತವಾಗಿ ದಾಖಲಿಸಲು ಮತ್ತು ಭೂದಾಖಲೆಗಳನ್ನು ನಿರ್ವಹಿಸಲು ಸೂಕ್ತ ಕ್ರಮ ಕೈಗೊಂಡರು. ಹಲವಾರು ವರ್ಷಗಳ ಕಾಲ ಪಂಚಾಕ್ಷರಿ ಮಹಾಮಂತ್ರವನ್ನು ಬರೆಯುವ ಪವಿತ್ರಕಾಯಕದಲ್ಲಿ ತೊಡಗಿದ್ದರು. ಇದರಿಂದಾಗಿ ಜನರು ಅವರನ್ನು “ಮಂತ್ರಮಹರ್ಷಿ”ಗಳೆಂದೇ ಭಕ್ತಿ-ಗೌರವಗಳಿಂದ ಕರೆಯುತ್ತಿದ್ದರು.

ಶ್ರೀಮನ್ಮಹಾರಾಜ ರಾಜಗುರುತಿಲಕ ಪರಮಪೂಜ್ಯ ಜಗದ್ಗುರು ಡಾ. ಶ್ರೀ ಶಿವರಾತ್ರಿ ರಾಜೇಂದ್ರ ಮಹಾಸ್ವಾಮಿಗಳವರು

ದಿನಾಂಕ 29.8.1916ರಂದು ಜನಿಸಿದರು. ತಮ್ಮ ಗುರುಗಳಾದ ಮಂತ್ರಮಹರ್ಷಿ ಶ್ರೀ ಶಿವರಾತ್ರೀಶ್ವರ ಮಹಾಸ್ವಾಮಿಗಳವರಿಂದ ಮಠದ ಜವಾಬ್ದಾರಿಯನ್ನು ವಹಿಸಿಕೊಂಡು 23ನೇ ಪೀಠಾಧ್ಯಕ್ಷರಾದರು. ಸಮಾಜದ ಸರ್ವತೋಮುಖ ಉದ್ಧಾರಕ್ಕೆ ಶಿಕ್ಷಣ ಅಗತ್ಯವೆಂಬುದನ್ನು ಮನಗಂಡು ಮೈಸೂರು ನಗರ ಹಾಗೂ ಗ್ರಾಮೀಣ ಪ್ರದೇಶಗಳಲ್ಲಿ ಶಾಲೆಗಳನ್ನು ಮತ್ತು ವಿದ್ಯಾರ್ಥಿನಿಲಯಗಳನ್ನು ಸ್ಥಾಪಿಸಿದರು. ಸಮಾಜಸೇವೆಗೆ ತಮ್ಮ ಜೀವನವನ್ನು ಮುಡಿಪಾಗಿಟ್ಟರು. ಪೂಜ್ಯರು ಶಿಕ್ಷಣಕ್ಷೇತ್ರಕ್ಕೆ ನೀಡಿದ ಕೊಡುಗೆಯನ್ನು ಗುರುತಿಸಿ ಅಂದು ಮೈಸೂರಿನ ದೊರೆಗಳಾಗಿದ್ದ ಶ್ರೀ ಜಯಚಾಮರಾಜೇಂದ್ರ ಒಡೆಯರ್‌ರವರು “ರಾಜಗುರುತಿಲಕ” ಎಂಬ ಬಿರುದನ್ನಿತ್ತು ಗೌರವಿಸಿದರು, ಮೈಸೂರು ವಿಶ್ವವಿದ್ಯಾನಿಲಯವು ಮರಣೋತ್ತರವಾಗಿ ಗೌರವ ಡಾಕ್ಟರೇಟ್‌ ಪುರಸ್ಕಾರ ನೀಡಿ ಸಮ್ಮಾನಿಸಿತು.

ಪರಮಪೂಜ್ಯ ಜಗದ್ಗುರು ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳವರು

ಮಠದ 24ನೇ ಪೀಠಾಧಿಪತಿಗಳಾಗಿ 1986ರಲ್ಲಿ ಜವಾಬ್ದಾರಿ ವಹಿಸಿಕೊಂಡು ಪೂಜ್ಯ ರಾಜೇಂದ್ರ ಶ್ರೀಗಳವರಿಂದ ಧಾರ್ಮಿಕ, ಆಧ್ಯಾತ್ಮಿಕ ಮತ್ತು ಆಡಳಿತಾತ್ಮಕ ಅನುಭವಗಳನ್ನು ಪಡೆದುಕೊಂಡರು. ಶ್ರೀ ಸುತ್ತೂರು ಮಠ ಹಾಗೂ ಜೆಎಸ್‌ಎಸ್ ಮಹಾವಿದ್ಯಾಪೀಠದ ನಿರಂತರ ಅಭಿವೃದ್ಧಿಗೆ ಪ್ರೇರಕಶಕ್ತಿಯಾಗಿರುವ ಪರಮಪೂಜ್ಯರ ಕ್ರಾಂತದರ್ಶಿ ಪ್ರಯತ್ನ ಮತ್ತು ಸಂಕಲ್ಪಶಕ್ತಿದಿಂದ ಇಂದು ಸಂಸ್ಥೆಯು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿ ಗಳಿಸಿದೆ.

ಜೆಎಸ್‌ಎಸ್‌ ಮಹಾವಿದ್ಯಾಪೀಠ

ಕಳೆದ ಶತಮಾನದಲ್ಲಿ ಮೈಸೂರಿನ ಸುತ್ತಮುತ್ತಲ ವಿದ್ಯಾರ್ಥಿಗಳು ಶಾಲಾಕಾಲೇಜುಗಳಲ್ಲಿ ವ್ಯಾಸಂಗ ಮಾಡಲು ತುಂಬ ಕಷ್ಟ ಪಡುತ್ತಿದ್ದರು. ಅವರ ಶೈಕ್ಷಣಿಕ ಅಗತ್ಯಗಳನ್ನು ಪೂರೈಸಲು ಮೈಸೂರಿನಲ್ಲಿ ಉಚಿತ ವಿದ್ಯಾರ್ಥಿ ವಸತಿನಿಲಯವನ್ನು ಪ್ರಾರಂಭಿಸುವ ಮೂಲಕ ಸುತ್ತೂರು ಶ್ರೀಮಠ ಶೈಕ್ಷಣಿಕ ಹಾಗೂ ಸಾಮಾಜಿಕ ಕ್ಷೇತ್ರದಲ್ಲಿ ಹೆಜ್ಜೆಯಿಟ್ಟಿತು. ಇಂದು ಕರ್ನಾಟಕ, ತಮಿಳುನಾಡು, ಉತ್ತರ ಪ್ರದೇಶ, ದೆಹಲಿ ಅಲ್ಲದೆ, ದುಬೈ ಮತ್ತು ಮಾರಿಷಸ್‌ನಲ್ಲಿ ಶಿಕ್ಷಣಸಂಸ್ಥೆಗಳನ್ನು, ಅಮೆರಿಕದ ಮೆರಿಲ್ಯಾಂಡ್‌ನಲ್ಲಿ ಆಧ್ಯಾತ್ಮಿಕ ಕೇಂದ್ರವನ್ನು ಹೊಂದಿದೆ. ಶ್ರೀಮಠದ 22ನೇ ಜಗದ್ಗುರುಗಳಾದ ಮಂತ್ರಮಹರ್ಷಿ ಶ್ರೀ ಶಿವರಾತ್ರೀಶ್ವರ ಮಹಾಸ್ವಾಮಿಗಳವರು ಶ್ರೀಮಠದ ಆಡಳಿತವನ್ನು ಸುವ್ಯವಸ್ಥೆಗೊಳಿಸಿದರು. 23ನೇ ಜಗದ್ಗುರುಗಳಾದ ರಾಜಗುರುತಿಲಕ ಡಾ. ಶ್ರೀ ಶಿವರಾತ್ರಿ ರಾಜೇಂದ್ರ ಮಹಾಸ್ವಾಮಿಗಳವರಿಗೆ ಕಾಯಕವೇ ಉಸಿರಾಗಿತ್ತು. ಮೈಸೂರಿಗೆ ವಿದ್ಯಾಭ್ಯಾಸಕ್ಕೆ ಬಂದ ಸಂದರ್ಭದಲ್ಲಿ ಅವರು ತಾವು ವಾಸ್ತವ್ಯವಿದ್ದ ಮನೆಯಲ್ಲಿಯೇ ಬಡ ವಿದ್ಯಾರ್ಥಿಗಳಿಗೆ ಊಟ, ವಸತಿಗಳನ್ನು ಕಲ್ಪಿಸಿದರು. ಇದೇ ಉದ್ದೇಶದ ವಿಸ್ತರಣೆಗಾಗಿ ಮೈಸೂರಿನಲ್ಲಿ 1954ರಲ್ಲಿ ಜೆಎಸ್‌ಎಸ್‌ ಮಹಾವಿದ್ಯಾಪೀಠವನ್ನು ಸಂಸ್ಥಾಪಿಸಿದರು. ಸುಸ್ಥಿರ ಮಾನವ ಸಂಪನ್ಮೂಲ ಅಭಿವೃದ್ಧಿಯ ಮೂಲಕ ಜನಜೀವನವನ್ನು ಸುಧಾರಿಸುವುದು ಪೂಜ್ಯರ ಮಹತ್ವಪೂರ್ಣ ಧ್ಯೇಯವಾಗಿತ್ತು. ಶ್ರೀಮಠದ ಆಶ್ರಯದಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದ ವಿವಿಧ ಸಂಸ್ಥೆಗಳ ಆಡಳಿತ ನಿರ್ವಹಿಸುವುದು ಮಹಾವಿದ್ಯಾಪೀಠದ ಹೊಣೆಗಾರಿಕೆಯಾಗಿದೆ. ಮಹಾವಿದ್ಯಾಪೀಠವು ಜನರಲ್ಲಿ ಮೌಲ್ಯಗಳು, ವೈಜ್ಞಾನಿಕತೆ ಮತ್ತು ವೈಚಾರಿಕತೆಯನ್ನು ಬೆಳೆಸುವ, ನೈತಿಕತೆಯನ್ನು ರೂಪಿಸುವ ಉದಾತ್ತ ಉದ್ದೇಶದಲ್ಲಿ ತೊಡಗಿದೆ. ಇಂದು ಜಾಗತಿಕ ಮಟ್ಟದಲ್ಲಿ ಯಶಸ್ಸನ್ನೂ ಗಳಿಸಿದೆ. ಶ್ರೀಮಠದ 24ನೇ ಜಗದ್ಗುರುಗಳಾಗಿರುವ ಪರಮಪೂಜ್ಯ ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳವರ ಧೀಶಕ್ತಿ ಮತ್ತು ಕರ್ತೃತ್ವ ಶಕ್ತಿಗಳ ಫಲವಾಗಿ ಇಂದು ಶ್ರೀಮಠ ಹಾಗೂ ಜೆಎಸ್‌ಎಸ್ ಮಹಾವಿದ್ಯಾಪೀಠಗಳು ಸಾಮುದಾಯಿಕ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸುತ್ತಿವೆ. ಈ ಸಂಸ್ಥೆಯ ಕೃಪಾಛತ್ರದಲ್ಲಿ ಒಂದು ಮಗು ಶಿಶುವಿಹಾರಕ್ಕೆ ಪ್ರವೇಶ ಪಡೆದರೆ ಸ್ನಾತಕೋತ್ತರದ ನಂತರ ಸಂಶೋಧನೆಗಳವರೆಗೆ ವ್ಯಾಸಂಗ ಮುಂದುವರಿಸಲೂ ಅವಕಾಶವಿದೆ. ಎಲ್ಲ ಜ್ಞಾನಶಿಸ್ತುಗಳೂ ಒಂದೇ ಸೂರಿನಡಿಯಲ್ಲಿ ಲಭಿಸುವಂಥ ಸಮರ್ಪಕ ಶೈಕ್ಷಣಿಕ ವ್ಯವಸ್ಥೆಗಳಿವೆ. ಶಿಕ್ಷಣ ಒಂದು ಮೂಲಭೂತ ಅವಶ್ಯಕತೆ ಎಂದು ಸದಾ ನಂಬಿರುವ ಜೆಎಸ್‌ಎಸ್‌ ಮಹಾವಿದ್ಯಾಪೀಠವು ಶಿಶುವಿಹಾರ, ಕನ್ನಡ ಮತ್ತು ಇಂಗ್ಲಿಷ್‌ ಮಾಧ್ಯಮಗಳ ಪೂರ್ವಪ್ರಾಥಮಿಕ ಶಾಲೆ, ಪ್ರೌಢ ಶಿಕ್ಷಣ, ಪದವಿಪೂರ್ವ ಶಿಕ್ಷಣ, ಸ್ನಾತಕ ಮತ್ತು ಸ್ನಾತಕೋತ್ತರ ತರಗತಿಗಳು, ಸಂಶೋಧನಾ ಕೇಂದ್ರಗಳು, ವೈದ್ಯಕೀಯ, ತಾಂತ್ರಿಕ ಹಾಗೂ ಪಾಲಿಟೆಕ್ನಿಕ್‌ ಶಿಕ್ಷಣ, ಕೃಷಿವಿಜ್ಞಾನ ಕೇಂದ್ರ ಮುಂತಾದ ಸಂಸ್ಥೆಗಳ ಮೂಲಕ ಸಮಾಜದ ಎಲ್ಲ ಸ್ತರಗಳ ವಿದ್ಯಾರ್ಥಿಗಳಿಗೆ, ಗ್ರಾಮೀಣ ಜನರಿಗೆ ಅಗತ್ಯವಾದ ಆಧುನಿಕ ಶಿಕ್ಷಣವನ್ನು ನೀಡುತ್ತಿದೆ. ಮಹಾವಿದ್ಯಾಪೀಠದ ಆಶ್ರಯದಲ್ಲಿ ಇಂದು 370 ಸಂಸ್ಥೆಗಳು ನಡೆಯುತ್ತಿವೆ; ಒಂದು ಲಕ್ಷಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಇಲ್ಲಿ ಅಧ್ಯಯನ ಮಾಡುತ್ತಿದ್ದಾರೆ. ಸುಮಾರು 10,000ಕ್ಕೂ ಹೆಚ್ಚು ಸಿಬ್ಬಂದಿಗೆ ಉದ್ಯೋಗ ನೀಡಿದೆ, ಬದುಕು ಕಟ್ಟಿಕೊಟ್ಟಿದೆ. ಹೀಗೆ ಧಾರ್ಮಿಕ, ಆಧ್ಯಾತ್ಮಿಕ, ಶೈಕ್ಷಣಿಕ, ಸಾಮಾಜಿಕ ಹಾಗೂ ಸಾಂಸ್ಕೃತಿಕ ರಂಗಗಳಲ್ಲಿ ತನ್ನದೇ ಆದ ವಿಶಿಷ್ಟ ರೀತಿಯಲ್ಲಿ ಸೇವೆ ಸಲ್ಲಿಸುತ್ತಿದೆ.

ಧಾರ್ಮಿಕ ಕಾರ್ಯಗಳು:

ಪರಂಪರೆಯ ಗುರುಗಳ ಗದ್ದುಗೆಗಳು ಇದ್ದು, ನಿತ್ಯಪೂಜೆ ಹಾಗೂ ಹಿರಿಯ ಗುರುಗಳ ಪುಣ್ಯಾರಾಧನೆ ಕಾರ್ಯಕ್ರಮಗಳು ನಡೆಯುತ್ತಿವೆ.
ದೈನಂದಿನ ಪೂಜೆ ಮತ್ತು ದಾಸೋಹ
ಅಮಾವಾಸ್ಯೆ ವಿಶೇಷ ಪೂಜೆ
ಪೂಜ್ಯರ ಸ್ಮರಣೋತ್ಸವ
ಕಾರ್ತಿಕ ಮಾಸ ಪೂಜೆ
ಶಿವರಾತ್ರಿ ಪೂಜೆ
ಬಸವ ಜಯಂತ್ಯೋತ್ಸವ
ಶ್ರಾವಣ ಮಾಸದಲ್ಲಿ ಮೈಸೂರು ಹಾಗೂ ಸುತ್ತೂರಿನಲ್ಲಿರುವ ಶ್ರೀಮಠಗಳಲ್ಲಿ ವಿಶೇಷ ಪೂಜೆಗಳು, ಪ್ರವಚನಗಳು ಹಾಗೂ ಪ್ರವಚನಗಳಲ್ಲಿ ಆಸಕ್ತಿಯುಳ್ಳವರಿಗಾಗಿ ಪ್ರಬಂಧ ಬರೆಯುವ ಸ್ಪರ್ಧೆಗಳನ್ನು ಆಯೋಜಿಸಲಾಗುತ್ತದೆ.
ಪ್ರತಿ ವರ್ಷ ಮಾರ್ಗಶಿರ ಬಹುಳ ಚತುರ್ದಷಿಯಿಂದ (ಮಹಾಶಿವರಾತ್ರಿ) ಆರಂಭವಾಗುವಂತೆ ಪರಮಪೂಜ್ಯ ಜಗದ್ಗುರು ಶ್ರೀ ಶಿವರಾತ್ರೀಶ್ವರ ಶಿವಯೋಗಿ ಮಹಾಸ್ವಾಮಿಗಳವರ ಜಯಂತಿ ಮಹೋತ್ಸವದ ಆಚರಣೆಗಳನ್ನು ನಡೆಸಲಾಗುತ್ತಿದೆ.
ಪರಮಪೂಜ್ಯ ಜಗದ್ಗುರು ಡಾ. ಶ್ರೀ ಶಿವರಾತ್ರಿ ರಾಜೇಂದ್ರ ಮಹಾಸ್ವಾಮಿಗಳವರ ಜಯಂತಿ ಮಹೋತ್ಸವದ ಆಚರಣೆಗಳನ್ನು ನಡೆಸಲಾಗುತ್ತಿದೆ.
ಪ್ರತಿ ಬೆಳದಿಂಗಳ ದಿನದಂದು ಆಯೋಜಿಸುವಂತಹ ಬೆಳದಿಂಗಳ ಸಂಗೀತ ಕಾರ್ಯಕ್ರಮ
ಶರಣ ಪಥ : ಇದು ೧೯೮೮ನೇ ಇಸವಿಯಲ್ಲಿ ಆರಂಭಿಸಲಾದಂತಹ ಅರ್ಧವಾರ್ಷಿಕ ಇಂಗ್ಲೀಷ್ ನಿಯತಕಾಲಿಕೆಯಾಗಿದ್ದು, ಶರಣ ಸಿದ್ಧಾಂತ, ಸಾಹಿತ್ಯ, ಭಾರತೀಯ ಕಲೆ ಹಾಗೂ ಸಂಸ್ಕೃತಿಗೆ ಸಮರ್ಪಿತವಾಗಿದೆ.
“ಪ್ರಸಾದ”, ಕನ್ನಡದಲ್ಲಿ ಪ್ರಕಟವಾಗುತ್ತಿರುವಂತಹ ಪತ್ರಿಕೆ.ಧರ್ಮ, ಸಾಹಿತ್ಯ, ಸಂಸ್ಕೃತಿ ಹಾಗೂ ಸಿದ್ಧಾಂತಕ್ಕೆ ಸಂಬಂಧಿಸಿದ ಮಾಹಿತಿ ಹಾಗೂ ವಿಶೇಷವಾಗಿ ವೀರಶೈವ ಸಾಹಿತ್ಯ ಹಾಗೂ ಸಂಸ್ಕೃತಿಯ ಕುರಿತಾದ ಜ್ಞಾನವನ್ನು ಒದಗಿಸುವ ವಿಶೇಷ ವೇದಿಕೆಯಾಗಿದೆ.
ಆಧ್ಯಾತ್ಮಿಕ ಪ್ರವಚನಗಳನ್ನು ಕ್ರಮಬದ್ಧ ಅವಧಿಯಲ್ಲಿ ಆಯೋಜಿಸುವ ಸಲುವಾಗಿ ಶ್ರೀ ಶಿವರಾತ್ರೀಶ್ವರ ಧಾರ್ಮಿಕ ದತ್ತಿಯ ಆಶ್ರಯದಡಿಯಲ್ಲಿ ‘ಶಿವಾನುಭವ ದಾಸೋಹ’ ಕಾರ್ಯಕ್ರಮವನ್ನು ೧೯೯೬ರಲ್ಲಿ ಆರಂಭಿಸಲಾಯಿತು. ಈ ಕಾರ್ಯಕ್ರಮವು ಸಾಕಷ್ಟು ಪ್ರಶಂಸೆಯನ್ನು ಪಡೆದುಕೊಂಡಿದೆ. ಪ್ರತಿ ತಿಂಗಳ ಕೊನೆಯ ಶನಿವಾರದಂದು ನಡೆಯುವ ಈ ಕಾರ್ಯಕ್ರಮದಲ್ಲಿ ಧರ್ಮ, ಜೀವನ, ಇತ್ಯಾದಿಯಂತಹ ವಿಷಯಗಳ ಕುರಿತಾದ ಪ್ರವಚನಗಳನ್ನು ಏರ್ಪಡಿಸಲಾಗುತ್ತದೆ.
ಜೆಎಸ್‌ಎಸ್ ವಾರ್ತಾ ಪತ್ರ: ಈ ಪತ್ರಿಕೆಯಲ್ಲಿ ಶ್ರೀ ಸುತ್ತೂರು ಮಠದಲ್ಲಿ ನಡೆಯುವ ಸಾಮಾಜಿಕ, ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಚಟುವಟಿಕೆಗಳ ಕುರಿತಂತೆ ಮಾಹಿತಿಯನ್ನು ಪ್ರಕಟಿಸಲಾಗುತ್ತದೆ.
ದಾಸೋಹ:ಸಂಪತ್ತು ಹಾಗೂ ಜ್ಞಾನದ ಹಂಚಿಕೆ
ಉತ್ತಮ ಸತ್ಕಾರ ಸುತ್ತೂರು ಮಠದ ಪ್ರಾಚೀನ ಸಂಪ್ರದಾಯವಾಗಿದೆ. ಸುತ್ತೂರಿನಲ್ಲಿರುವ ವಸತಿ ಶಾಲೆಯಲ್ಲಿ ಅನ್ನದಾಸೋಹ ಕಾರ್ಯಕ್ರಮದಡಿ ಸುಮಾರು ೪,೦೦೦ ಮಕ್ಕಳಿಗೆ ಉಚಿತವಾಗಿ ಆಹಾರವನ್ನು ಒದಗಿಸಲಾಗುತ್ತಿದೆ. ಯಳಂದೂರು ತಾಲ್ಲೂಕಿನಲ್ಲಿ, ಅಕ್ಷಯ ದಾಸೋಹ ಯೋಜನೆಯಡಿ ಸುಮಾರು ೧೦,೦೦೦ ಮಕ್ಕಳಿಗೆ ಉಚಿತವಾಗಿ ಊಟವನ್ನು ಒದಗಿಸಲಾಗುತ್ತಿದೆ. ಇದರ ಜೊತೆಗೆ, ಶ್ರೀಮಠದ ಆಶ್ರಯದಡಿಯಲ್ಲಿ ವಿವಿಧ ಸ್ಥಳದಲ್ಲಿ ನಡೆಯುತ್ತಿರುವಂತಹ ೨೦ ಉಚಿತ ವಸತಿನಿಲಯಗಳಲ್ಲಿ ೨,೦೦೦ಕ್ಕೂ ಹೆಚ್ಚಿನ ವಿದ್ಯಾರ್ಥಿಗಳಿಗೆ ಉಚಿತವಾಗಿ ಅನ್ನದಾಸೋಹವನ್ನು ಒದಗಿಸಲಾಗುತ್ತಿದೆ.

ಸಾಮಾಜಿಕ ಹಾಗು ಶೈಕ್ಷಣಿಕ ಕಾರ್ಯಗಳು:

ಜೆಎಸ್‌ಎಸ್ ಆಸ್ಪತ್ರೆ, ಮೈಸೂರು

ಪರಮಪೂಜ್ಯ ಜಗದ್ಗುರು ಡಾ. ಶಿವರಾತ್ರಿ ರಾಜೇಂದ್ರ ಮಹಾಸ್ವಾಮಿಗಳವರಿಂದ ೧೯೬೩ರಲ್ಲಿ ಆರಂಭವಾದಂತಹ ಜೆಎಸ್‌ಎಸ್ ಆರೋಗ್ಯ ಕೇಂದ್ರ ಇಂದು, ಶ್ರೀ ಸುತ್ತೂರು ಮಠ ಹಾಗೂ ಜೆಎಸ್‌ಎಸ್ ಮಹಾವಿದ್ಯಾಪೀಠದ ಆಶ್ರಯದಲ್ಲಿ ಮಹತ್ತರವಾದ ಆರೋಗ್ಯಸೇವೆ ಹಾಗೂ ವೈದ್ಯಕೀಯ ಶಿಕ್ಷಣ ಸಂಸ್ಥೆಯಾಗಿ ವಿಕಾಸಗೊಂಡಿದೆ. ಒಂದೇ ಸೂರಿನಡಿ ೧,೮೦೦ ಹಾಸಿಗೆಗಳಿರುವ ಈಗಿನ ಹೊಸ ಜೆಎಸ್‌ಎಸ್ ಆಸ್ಪತ್ರೆ ಭಾರತದ ಅತಿ ದೊಡ್ಡ ಆಸ್ಪತ್ರೆಗಳಲ್ಲಿ ಒಂದಾಗಿದೆ. ಈ ಆಸ್ಪತ್ರೆಯು ೨೬೦ ಹಾಸಿಗೆಗಳುಳ್ಳ ಅತಿ ದೊಡ್ಡ ನಿರ್ಣಾಯಕ ಹಾಗೂ ತುರ್ತು ಚಿಕಿತ್ಸಾ ಸೌಲಭ್ಯಗಳಿರುವ ಹೆಗ್ಗಳಿಕೆಯನ್ನು ಹೊಂದಿದೆ. ಜೀವನದ ಮೌಲ್ಯಗಳನ್ನು ಎತ್ತಿಹಿಡಿಯುವುದು ಹಾಗೂ ಸಮಾಜದ ಎಲ್ಲ ವರ್ಗಗಳ ಜನರಿಗೂ ಕೈಗೆಟಕುವ ದರಗಳಲ್ಲಿ ಆರೋಗ್ಯಸೇವೆಗಳನ್ನು ಒದಗಿಸುವುದು ಈ ಆಸ್ಪತ್ರೆಯ ಪರಮೋದ್ದೇಶವಾಗಿದೆ.

ಜೆಎಸ್‌ಎಸ್ ಆಸ್ಪತ್ರೆ, ಚಾಮರಾಜನಗರ

ಸುತ್ತೂರು ಮಠದ ಆಶ್ರಯದಲ್ಲಿ ಸ್ಥಾಪಿಸಲಾಗಿರುವ ವಿಶಾಲಶ್ರೇಣಿಯ ಆರೋಗ್ಯರಕ್ಷಣಾ ಸೇವಾ ಕೇಂದ್ರಗಳಿಗೆ ಚಾಮರಾಜನಗರದ ಜೆಎಸ್‌ಎಸ್ ಆಸ್ಪತ್ರೆ ಮತ್ತೊಂದು ಸೇರ್ಪಡೆಯಾಗಿದೆ. ಇದು ೧೦೦ ಹಾಸಿಗೆಗಳಿರುವ ಆಸ್ಪತ್ರೆಯಾಗಿದ್ದು, ಪಟ್ಟಣ ಹಾಗೂ ಸುತ್ತಮುತ್ತಲಿನ ಪ್ರದೇಶಗಳ ಜನರಿಗೆ ಅತ್ಯಾಧುನಿಕ ಹಾಗೂ ವ್ಯಕ್ತಿಗತ ಆರೋಗ್ಯರಕ್ಷಣಾ ಸೇವೆಗಳನ್ನು ಒದಗಿಸುವ ಗುರಿಯನ್ನು ಹೊಂದಿದೆ.

ಜೆಎಸ್‌ಎಸ್ ಆಯುರ್ವೇದ ಆಸ್ಪತ್ರೆ, ಮೈಸೂರು

ಮೈಸೂರು ನಗರದ ಲಲಿತಾದ್ರಿಪುರದಲ್ಲಿ ಚಾಮುಂಡಿ ಬೆಟ್ಟದ ತಪ್ಪಲಿನಲ್ಲಿ ಸ್ಥಾಪಿಸಲಾಗಿರುವ ಜೆಎಸ್‌ಎಸ್ ಆಯುರ್ವೇದ ಆಸ್ಪತ್ರೆ, ಎಲ್ಲಾ ಅಗತ್ಯ ಚಿಕಿತ್ಸಾ ಸೌಲಭ್ಯಗಳನ್ನು ಹೊಂದಿರುವ ಸುಸಜ್ಜಿತ ಆಸ್ಪತ್ರೆಯಾಗಿದ್ದು, ರೋಗಿಗಳಿಗೆ ಪ್ರಾಮಾಣಿಕ ಆಯುರ್ವೇದ ಚಿಕಿತ್ಸೆ ಹಾಗೂ ಸರ್ವಾಂಗೀಣ ಅವಲೋಕನಗಳನ್ನು ಆಧರಿಸಿದ ಪರಿಹಾರಗಳನ್ನು ಒದಗಿಸುವ ಆಶಯವನ್ನು ಹೊಂದಿದೆ. ಆಸ್ಪತ್ರೆ ಸ್ಥಾಪನೆಯಾದ ಆರಂಭದಲ್ಲಿ, ಮೈಸೂರು, ಚಾಮರಾಜನಗರ, ಕೊಡಗು ಹಾಗೂ ಮಂಡ್ಯ ಜಿಲ್ಲೆಗಳ ಬಡ ಹಾಗೂ ಗ್ರಾಮೀಣ ಜನರ ಆರೋಗ್ಯ ಸೇವೆಗಳ ಅಗತ್ಯವನ್ನು ಪೂರೈಸುತಿತ್ತು. ಆದರೆ ಇಂದು ಈ ಆಸ್ಪತ್ರೆ ಎಷ್ಟು ಜನಪ್ರಿಯತೆಯನ್ನು ಗಳಿಸಿದೆ ಎಂದರೆ ವಿವಿಧ ಖಾಯಿಲೆಗಳು, ಅನಾರೋಗ್ಯ ಸಮಸ್ಯೆಗಳಿಗೆ ಆಯುರ್ವೇದ ಚಿಕಿತ್ಸೆಯನ್ನು ಕೋರಿ ಜಗತ್ತಿನಾದ್ಯಂತ ಜನರು ಇಲ್ಲಿಗೆ ಅರಸಿ ಬರುತ್ತಾರೆ.

ಜೆಎಸ್‌ಎಸ್ ಶಾಲೆ, ಸುತ್ತೂರು

ಶ್ರೀಮಠದ ವಿಶೇಷ ಆಕರ್ಷಣೆಯಾದ ಸುತ್ತೂರಿನ ಜೆಎಸ್‌ಎಸ್ ಶಾಲೆಯನ್ನು ಗ್ರಾಮೀಣ ಪ್ರದೇಶಗಳ ಕುಟುಂಬಗಳಿಂದ ಬಂದಂತಹ ಬಡ ಮಕ್ಕಳಿಗೆ ಉಚಿತವಾಗಿ ಗುಣಮಟ್ಟದ ಶಿಕ್ಷಣವನ್ನು ಒದಗಿಸುವ ಹಾಗೂ ಆ ಮೂಲಕ ಸವಲತ್ತುವಂಚಿತರನ್ನು ಸಬಲರನ್ನಾಗಿಸುವ ಉದ್ದೇಶದೊಂದಿಗೆ ಸ್ಥಾಪಿಸಲಾಯಿತು. ಈ ಶಾಲೆ ೬೦ ಎಕರೆಗಳ ವಿಶಾಲವಾದ, ಅದ್ಭುತ ಹಾಗೂ ಪ್ರಶಾಂತವಾದ ಪ್ರದೇಶವ್ಯಾಪ್ತಿಯಲ್ಲಿ ನಿರ್ಮಾಣಗೊಂಡಿದೆ. ಇಲ್ಲಿ ಯಾವುದೇ ಧರ್ಮ, ಜಾತಿ, ವರ್ಣ ಭೇದಗಳಿಲ್ಲದೆ, ರಾಷ್ಟ್ರಾದ್ಯಂತ ವಿವಿಧ ಭಾಗಗಳಿಂದ ಬಂದಂತಹ ಸಾವಿರಾರು ಸಂಖ್ಯೆಯ ವಿದ್ಯಾರ್ಥಿಗಳು ಶಿಕ್ಷಣವನ್ನು ಪಡೆಯುತ್ತಿದ್ದಾರೆ. ಈ ಮಕ್ಕಳು ಬಡ ಪ್ರಾಂತ್ಯಗಳಿಂದ, ವಿಶೇಷವಾಗಿ ಕರ್ನಾಟಕದ ಬರಪೀಡಿತ ಹಾಗೂ ಅತ್ಯಂತ ಹಿಂದುಳಿದ ಪ್ರದೇಶಗಳಿಂದ ಬಂದಂತಹವರಾಗಿದ್ದಾರೆ. ಮಣಿಪುರ, ಮೇಘಾಲಯ, ಜಾರ್ಖಂಡ್ ಹಾಗೂ ಬಿಹಾರ್ ರಾಜ್ಯಗಳಿಂದ ಬಂದಂತಹ ನಿರಾಶ್ರಿತ ಮಕ್ಕಳು ಈ ಶಾಲೆಯಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ಪ್ರಸ್ತುತ ಈ ಶಾಲೆಯು ಕನ್ನಡ ಹಾಗೂ ಆಂಗ್ಲ ಎರಡು ಮಾಧ್ಯಮಗಳಲ್ಲಿ ಶಿಕ್ಷಣವನ್ನು ಒದಗಿಸುತ್ತಿದ್ದು, ೪,೦೦೦ಕ್ಕೂ ಹೆಚ್ಚಿನ ಸಂಖ್ಯೆಯ ವಿದ್ಯಾರ್ಥಿಗಳಿದ್ದಾರೆ. ಈ ಪೈಕಿ ೩,೦೦೦ ಮಕ್ಕಳು ವಸತಿಸಹಿತ ಶಿಕ್ಷಣವನ್ನು ಪಡೆಯುತ್ತಿದ್ದು, ಉಳಿದವರು ವಸತಿರಹಿತ ಶಿಕ್ಷಣ ಪಡೆಯುತ್ತಿದ್ದಾರೆ. ಪ್ರಸ್ತುತ ಈ ಶಾಲೆಯಲ್ಲಿ ರಾಜ್ಯ ಪಠ್ಯಕ್ರಮದಡಿ ನರ್ಸರಿಯಿಂದ ೧೦ನೇ ತರಗತಿಯವರೆಗೂ ಶಿಕ್ಷಣವನ್ನು ಕಲ್ಪಿಸಲಾಗುತ್ತಿದೆ. ಅರ್ಹ ಹಾಗೂ ಸಮರ್ಪಿತ ಬೋಧಕರ ತಂಡವಿದೆ.

ಆರೋಗ್ಯಸೇವೆ – ಮಾದರಿ ಆರೋಗ್ಯ ಗ್ರಾಮ

ಸುತ್ತೂರು ಶ್ರೀಕ್ಷೇತ್ರದಲ್ಲಿ ಆರೋಗ್ಯಸೇವೆಗೆ ಹೆಚ್ಚಿನ ಮಹತ್ವವನ್ನು ನೀಡಲಾಗಿದೆ. ಗ್ರಾಮದ ಕುಟುಂಬಗಳನ್ನು ಉಚಿತವಾಗಿ ಆರೋಗ್ಯ ಸೇವೆಗಳನ್ನು ಖಾತ್ರಿಪಡಿಸುವ ‘ಮಾದರಿ ಆರೋಗ್ಯ ಗ್ರಾಮ’ ಯೋಜನೆ ವ್ಯಾಪ್ತಿಯಡಿ ತರಲಾಗಿದೆ.

ಕುಡಿಯುವ ನೀರು ಹಾಗೂ ನೈರ್ಮಲ್ಯ

ರಾಜೀವ್ ಗಾಂಧಿ ಕುಡಿಯುವ ನೀರು ಸರಬರಾಜು ಯೋಜನೆಯಡಿಯಲ್ಲಿ ಸುತ್ತೂರು ಗ್ರಾಮಕ್ಕೆ ಕುಡಿಯುವ ನೀರನ್ನು ಒದಗಿಸಲಾಗಿದೆ. ಈ ಮೂಲಕ ಗ್ರಾಮಸ್ಥರಿಗೆ ಪ್ರತಿ ದಿನಕ್ಕೆ ೭೦ ಎಲ್‌ಪಿಸಿಡಿ (ದಿನವೊಂದಕ್ಕೆ ಪ್ರತಿ ವ್ಯಕ್ತಿಗೆ ನೀಡುವ ಲೀಟರ್ ನೀರಿನ ಪ್ರಮಾಣ) ನೀರನ್ನು ಒದಗಿಸಲಾಗುತ್ತಿದೆ.

ಗೋಶಾಲೆ

ಶ್ರೀಮಠವು ಸುತ್ತೂರಿನಲ್ಲಿ ಗೋಶಾಲೆಯೊಂದನ್ನು ಸ್ಥಾಪಿಸಿದೆ. ಈ ಗೋಶಾಲೆಯಲ್ಲಿ ಗೋವುಗಳ ಆರೈಕೆಗಾಗಿ ಉತ್ಕೃಷ್ಟ ಗುಣಮಟ್ಟದ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ. ಜೊತೆಗೆ, ಭಾರತೀಯ ವಿಶೇಷ ತಳಿಗಳ ಗೋವುಗಳನ್ನು ಸಂರಕ್ಷಿಸುವ ಪ್ರಯತ್ನಗಳೂ ಇಲ್ಲಿ ನಡೆಯುತ್ತಿದೆ.

ಸಂತ್ರಸ್ತರಿಗೆ ಸಹಾಯಹಸ್ತ

ಶ್ರೀ ಸುತ್ತೂರು ಮಠ, ಮೈಸೂರು ನಾಗರಿಕರ ವೇದಿಕೆ ಸಹಯೋಗದಲ್ಲಿ ರಾಷ್ಟ್ರ ಮಟ್ಟದಲ್ಲಿ ಹಲವಾರು ಸಮಾಜ ಕಾರ್ಯಗಳನ್ನು ಕೈಗೊಳ್ಳುತ್ತಿದೆ. ನೈಸರ್ಗಿಕ ವಿಕೋಪಗಳಿಗೆ ಸಿಲುಕಿದಂತಹ ಸಾವಿರಾರು ಸಂತ್ರಸ್ತರಿಗೆ ಸಂದರ್ಭಕ್ಕನುಸಾರವಾಗಿ ಅಗತ್ಯ ನೆರವನ್ನು ಈ ಮೂಲಕ ಕಲ್ಪಿಸಲಾಗಿದೆ. ಪುದುಚೆರಿಯಲ್ಲಿ ನಡೆದಂತಹ ಸುನಾಮಿ ಸಂತ್ರಸ್ತರಾಗಲಿ, ಕರ್ನಾಟಕದ ಕೊಡಗು ಹಾಗೂ ಕೇರಳದಲ್ಲಿ ನಡೆದಂತಹ ನೆರೆ ಹಾವಳಿಯಾಗಲಿ, ಸಂತ್ರಸ್ತರಿಗೆ ಅಗತ್ಯ ಸಮಯೋಚಿತ ಸಹಾಯವನ್ನು ಕಲ್ಪಿಸಲಾಗಿದೆ.

ವಿಶೇಷಚೇತನರ ಸಬಲೀಕರಣ

ವಿಶೇಷಚೇತನರನ್ನು ಸಮಾಜದ ಮುಖ್ಯವಾಹಿನಿಗೆ ಸೇರ್ಪಡೆಗೊಳಿಸಲು ಜೆಎಸ್‌ಎಸ್ ಮಹಾವಿದ್ಯಾಪೀಠವು ವಿಶೇಷಚೇನತರಿಗಾಗಿಯೇ ಪ್ರತ್ಯೇಕವಾಗಿ ಸಹನಾ ಶಾಲೆಗಳು ಹಾಗೂ ಪಾಲಿಟೆಕ್ನಿಕ್ (ಕಾಲೇಜು) ಅನ್ನು ನಡೆಸುತ್ತಿದೆ. ವಿಶೇಷಚೇತನ ಮಕ್ಕಳಿಗೆ ಶಿಕ್ಷಣ ಒದಗಿಸುವುದು ಹಾಗೂ ಅವರ ಹಕ್ಕುಗಳು ಹಾಗೂ ಜವಾಬ್ದಾರಿಗಳ ಕುರಿತಂತೆ ಅರಿವು ಮೂಡಿಸುವುದು, ಅವರಲ್ಲಿರುವ ಪ್ರತಿಭೆ ಹಾಗೂ ಸಾಮರ್ಥ್ಯವನ್ನು ಬಹಿರಂಗಪಡಿಸುವುದು ಹಾಗೂ ಅವರನ್ನು ಸಮಾಜದ ಮುಖ್ಯವಾಹಿನಿಯಲ್ಲಿ ಏಕೀಕರಣಗೊಳಿಸುವುದು ಈ ಸಂಸ್ಥೆಗಳ ಉದ್ದೇಶವಾಗಿದೆ. ಸಹನಾ ಶಾಲೆಗಳಲ್ಲಿ ಮಕ್ಕಳಿಗೆ ವಿಶೇಷ ತರಬೇತಿ ಪಡೆದಿರುವ ಬೋಧಕರಿಂದ ಬೋಧನೆಯನ್ನು ಒದಗಿಸಿ ಆ ಮೂಲಕ ಅವರನ್ನು ಇತರೆ ಮಕ್ಕಳೊಂದಿಗೆ ಸಮೀಕರಣಗೊಳಿಸಲಾಗುತ್ತದೆ. ಜೆಎಸ್‌ಎಸ್ ವಿಶೇಷಚೇನತರ ಪಾಲಿಟೆಕ್ನಿಕ್ ಅನ್ನು ೧೯೯೧ರಲ್ಲಿ ಆರಂಭಿಸಲಾಯಿತು ಹಾಗೂ ಹೊಸ ಕಟ್ಟಡವನ್ನು ೧೯೯೯ರ ಜನವರಿಯಲ್ಲಿ ರಾಷ್ಟ್ರದ ಅಂದಿನ ಪ್ರಧಾನಿ ಶ್ರೀ ಅಟಲ್ ಬಿಹಾರಿ ವಾಜಪೇಯಿ ಅವರು ಉದ್ಘಾಟಿಸಿದರು. ಈ ಪಾಲಿಟೆಕ್ನಿಕ್ ಆರು ಡಿಪ್ಲೊಮಾ ಕೋರ್ಸ್ಗಳನ್ನು ಒದಗಿಸುವಂತಹ ಈ ರೀತಿಯ ಭಾರತದ ಏಕೈಕ ಪಾಲಿಟೆಕ್ನಿಕ್ ಆಗಿದೆ. ಭಾರತ ಸರ್ಕಾರದ ಮಾನವ ಸಂಪನ್ಮೂಲಗಳ ಇಲಾಖೆಯು ಈ ಪಾಲಿಟೆಕ್ನಿಕ್ ಅನ್ನು ವಿಶೇಷಚೇತನರಿಗೆ ಸುಧಾರಿತ ತಾಂತ್ರಿಕ ಹಾಗೂ ವೃತ್ತಿಪರ ಶಿಕ್ಷಣವನ್ನು ಒದಗಿಸುವಂತಹ ಸಂಪನ್ಮೂಲ ಕೇಂದ್ರವೆಂದು ಪರಿಗಣಿಸಿದೆ.

ಮಹಿಳಾ ಸಬಲೀಕರಣ

ಸಮಾಜ ಹಾಗೂ ರಾಷ್ಟ್ರದ ಅಭಿವೃದ್ಧಿ, ಮಹಿಳಾ ಸಬಲೀಕರಣ, ಅದರಲ್ಲಿಯೂ ಗ್ರಾಮೀಣ ಮಹಿಳೆಯರ ಸಬಲೀಕರಣವನ್ನು ಅವಲಂಬಿಸಿದೆ. ಜೆಎಸ್‌ಎಸ್ ಮಹಾವಿದ್ಯಾಪೀಠ ಸಮಾಜದ ಎಲ್ಲ ವರ್ಗಗಳ ಮಹಿಳೆಯರಿಗೂ ಗುಣಮಟ್ಟದ ಶಿಕ್ಷಣವನ್ನು ಒದಗಿಸುವ ಸಂಕಲ್ಪದೊAದಿಗೆ ಮೈಸೂರು ನಗರ ಹಾಗೂ ಗ್ರಾಮೀಣ ಪ್ರದೇಶಗಳಲ್ಲಿ ಹಲವಾರು ಕಾಲೇಜುಗಳನ್ನು ಸ್ಥಾಪಿಸಿದೆ.

ಮಹಿಳೆಯರ ಕಾಲೇಜು: ಮೈಸೂರು, ಕೊಳ್ಳೇಗಾಲ ಹಾಗೂ ಚಾಮರಾಜನಗರಗಳಲ್ಲಿ ಮೂರು ಮಹಿಳಾ ಕಾಲೇಜುಗಳು

ಮಹಿಳೆಯರ ಸ್ವಉದ್ಯೋಗ ಸಲಹಾ ಕೇಂದ್ರ:

ಮಹಿಳೆಯರಿಗೆ ಹಲವು ಅಲ್ಪಾವಧಿ ಕೋರ್ಸ್ಗಳನ್ನು ನಡೆಸಲಾಗುತ್ತಿದೆ.
ಮಹಿಳೆಯರಿಗೆ ಸ್ವಂತ ವ್ಯಾಪಾರ ಕೈಗೊಳ್ಳಲು ಸಲಹಾ ಸೇವೆಗಳನ್ನು ಒದಗಿಸಲಾಗುತ್ತಿದೆ.

ಐಸಿಎಆರ್ ಜೆಎಸ್‌ಎಸ್ ಕೃಷಿ ವಿಜ್ಞಾನ ಕೇಂದ್ರ ಕೃಷಿ ವಿಜ್ಞಾನ ಕೇಂದ್ರ, ಸುತ್ತೂರು

ಜೆಎಸ್‌ಎಸ್ ವಿಜ್ಞಾನ ಹಾಗೂ ತಂತ್ರಜ್ಞಾನ ವಿಶ್ವವಿದ್ಯಾಲಯ

ಜೆಎಸ್‌ಎಸ್ ಉನ್ನತ ಶಿಕ್ಷಣ ಹಾಗೂ ಸಂಶೋಧನಾ ಅಕಾಡೆಮಿ

ಜೆಎಸ್‌ಎಸ್ ರುಡ್‌ಸೆಟ್

ವೈದ್ಯಕೀಯ ಶಿಕ್ಷಣ ಹಾಗೂ ಆರೋಗ್ಯ ಸೇವೆಗಳು

ವೈದ್ಯಕೀಯ ಕಾಲೇಜು – ೧
ಫಾರ್ಮಸಿ ಕಾಲೇಜು – ೨
ದಂತ ವೈದ್ಯಕೀಯ ಕಾಲೇಜು – ೧
ಆಯುರ್ವೇದ ಕಾಲೇಜು – ೧
ಪ್ರಕೃತಿ ಚಿಕಿತ್ಸೆ ಹಾಗೂ ಯೋಗ ವಿಜ್ಞಾನ – ೧
ವಾಕ್ ಮತ್ತು ಶ್ರವಣ ಸಂಸ್ಥೆಗಳು – ೨
ಫಿಸಿಯೋಥೆರಪಿ ಕಾಲೇಜು – ೧
ನರ್ಸಿಂಗ್ ಶಾಲೆಗಳು – ೩
ಆಸ್ಪತ್ರೆಗಳು – ೬
ಆರೋಗ್ಯ ಕೇಂದ್ರಗಳು – ೨
ಔಷಧ ಕೇಂದ್ರಗಳು – ೬

ವೃತ್ತಿಪರ ಸಂಸ್ಥೆಗಳು

ಜೆಎಸ್‌ಎಸ್ ವಿಜ್ಞಾನ ಹಾಗೂ ತಂತ್ರಜ್ಞಾನ ವಿಶ್ವವಿದ್ಯಾಲಯ
ಎಸ್‌ಜೆಸಿಇ, ಮೈಸೂರು – ೧
ಇಂಜಿನಿಯರಿಂಗ್ ಕಾಲೇಜುಗಳು – ೩
ಪಾಲಿಟೆಕ್ನಿಕ್‌ಗಳು – ೪
ಕೈಗಾರಿಕಾ ತರಬೇತಿ ಸಂಸ್ಥೆಗಳು – ೩

ವಿಜ್ಞಾನ ಹಾಗೂ ತಂತ್ರಜ್ಞಾನ ಉದ್ಯಮಶೀಲತಾ ಕೇಂದ್ರಗಳು

ಎಸ್‌ಜೆಸಿಇ, ಮೈಸೂರು – ೧
ಇಂಜಿನಿಯರಿಂಗ್ ಕಾಲೇಜುಗಳು – ೩
ಪಾಲಿಟೆಕ್ನಿಕ್‌ಗಳು – ೪
ಕೈಗಾರಿಕಾ ತರಬೇತಿ ಕೇಂದ್ರಗಳು – ೩
ವಿಜ್ಞಾನ ಹಾಗೂ ತಂತ್ರಜ್ಞಾನ ಉದ್ಯಮಶೀಲತಾ ಪಾರ್ಕ್ಗಳು – ೩
ವ್ಯವಹಾರ ನಿರ್ವಹಣೆ ಶಿಕ್ಷಣ ಸಂಸ್ಥೆ – ೧
ತಾಂತ್ರಿಕ ಶಿಕ್ಷಣದ ಇತರೆ ಸಂಸ್ಥೆಗಳ ವಿಭಾಗ – ೪
ರಾಷ್ಟ್ರೀಯ/ಅಂತರರಾಷ್ಟ್ರೀಯ ಕಂಪನಿಗಳು – ೪

ಜಾಗತೀಕರಣದೆಡೆಗೆ

ತರಬೇತಿ ಸಂಸ್ಥೆಗಳು – ೨
ಪೋಷಕ ಸಂಸ್ಥೆಗಳು – ೨
ಸಹಕಾರ ಸಂಘಗಳು – ೨
ಇತರೆ ಸಂಸ್ಥೆಗಳು – ೨

ಕಲೆ, ಸಾಹಿತ್ಯ ಹಾಗೂ ಸಂಸ್ಕೃತಿಯ ವಿಸ್ತರಣೆ

ಸಾಹಿತ್ಯ, ಸಂಸ್ಕೃತಿ ಹಾಗೂ ಲಲಿತ ಕಲೆಗಳು – ೪
ಪ್ರಕಾಶನಗಳು – ೪

ಸಾಮಾನ್ಯ ಶಿಕ್ಷಣ

ಶಿಶು ವಿಹಾರಗಳು – ೭
ನರ್ಸರಿ ಶಾಲೆಗಳು – ೨೩
ಪ್ರೌಢಶಾಲೆಗಳು – ೬೨
ವಿಶೇಷ (ಸಹನಾ) ಶಾಲೆಗಳು – ೨
ಸಂಸ್ಕೃತ ಪಾಠಶಾಲೆಗಳು – ೧೦
ಪದವಿಪೂರ್ವ ಕಾಲೇಜುಗಳು – ೨೩
ಪದವಿ ಕಾಲೇಜುಗಳು – ೬
ಕಾನೂನು ಕಾಲೇಜು – ೧
ಪಬ್ಲಿಕ್ ಶಾಲೆಗಳು – ೧೭
ಡಿ.ಇಡಿ. ಕಾಲೇಜುಗಳು – ೨
ಬಿ.ಇಡಿ. ಕಾಲೇಜುಗಳು – ೪
ಸಂಸ್ಕೃತ ಪದವಿ ಕಾಲೇಜು – ೧
ಲಲಿತ ಕಲೆಗಳ ಸಂಸ್ಥೆ – ೧
ಜನಶಿಕ್ಷಣ ಸಂಸ್ಥೆ – ೨
ಜೆಎಸ್‌ಎಸ್ ಕರ್ನಾಟಕ ಮುಕ್ತ ಶಾಲೆ – ೧

ವಿದ್ಯಾರ್ಥಿನಿಲಯಗಳು

ವಸತಿಗೃಹಗಳು – ೯
ಸಾಮಾನ್ಯ ವಿದ್ಯಾರ್ಥಿನಿಲಯಗಳು – ೭
ಶಿಕ್ಷಣ ಸಂಸ್ಥೆಗಳಿಗೆ ಹೊಂದಿಕೊಡಲಾದ ವಿದ್ಯಾರ್ಥಿನಿಲಯಗಳು – ೪೨

ಪೂರಕ ಸಾಮಾಜಿಕ ಸಂಸ್ಥೆಗಳು

ಮಂಗಳ ಮಂಪಟಗಳು – ೮
ಸಭಾಂಗಣಗಳು – ೫
ಹಿರಿಯ ನಾಗರಿಕರ ಸೇವಾ ಕೇಂದ್ರಗಳು – ೪
ಗುರುಕುಲಗಳು – ೨
ಕುಠೀರಗಳು – ೨

ಇತರೆ

ಕೃಷಿ ಉತ್ತೇಜನಾ ಸಂಸ್ಥೆಗಳು – ೨
ದತ್ತಿಗಳು – ೧೫

ಶ್ರೀಮಠದ ಆಶ್ರಯದಲ್ಲಿ ಹಲವಾರು ಅನಾಥಾಲಯಗಳು, ನಿರ್ಗತಿಕ ಮಕ್ಕಳ ಗೃಹಗಳು ಹಾಗೂ ಉಚಿತ ವಿದ್ಯಾರ್ಥಿನಿಲಯಗಳನ್ನು ಈ ಕೆಳಕಂಡ ಸ್ಥಳಗಳಲ್ಲಿ ನಡೆಸಲಾಗುತ್ತಿದೆ:

ಕೆಎಸ್‌ಎಸ್ ಅನಾಥಾಲಯ, ವಾಣಿವಲಾಸ ರಸ್ತೆ, ಮೈಸೂರು
ಜೆಎಸ್‌ಎಸ್ ವಿದ್ಯಾರ್ಥಿನಿಲಯ (ಮುಖ್ಯ ಕಟ್ಟಡ), ವಾಣಿವಿಲಾಸ ರಸ್ತೆ, ಮೈಸೂರು
ಜೆಎಸ್‌ಎಸ್ ವಿದ್ಯಾರ್ಥಿನಿಲಯ, ಸುತ್ತೂರು
ಜೆಎಸ್‌ಎಸ್ ನಿರ್ಗತಿಕ ಮಕ್ಕಳ ಗೃಹ, ಸುತ್ತೂರು
ಜೆಎಸ್‌ಎಸ್ ಅನಾಥಾಲಯ, ಜೋಡಿ ರಸ್ತೆ, ಚಾಮರಾಜನಗರ
ಜಗದ್ಗುರು ಶ್ರೀ ಶಿವರಾತ್ರೀಶ್ವರ ಪ್ರಸಾದನಿಲಯ, ಜಗದ್ಗುರು ಡಾ. ಶ್ರೀ ಶಿವರಾತ್ರಿ ರಾಜೇಂದ್ರ ವೃತ್ತ, ರಾಮಾನುಜ ರಸ್ತೆ, ಮೈಸೂರು
ಜಗದ್ಗುರು ಶ್ರೀ ಶಿವರಾತ್ರೀಶ್ವರ ಮೆಟ್ರಿಕ್‌ಪೂರ್ವ ಬಾಲಕರ ವಿದ್ಯಾರ್ಥಿನಿಲಯ, ರಾಮಾಪುರ, ಹನೂರು
ಜಗದ್ಗುರು ಶ್ರೀ ಶಿವರಾತ್ರೀಶ್ವರ ಅನಥಾಲಯ, ತೆರಕಣಾಂಬಿ, ಗುಂಡ್ಲುಪೇಟೆ
ಜೆಎಸ್‌ಎಸ್ ನಿರ್ಗತಿಕ ಮಕ್ಕಳ ಗೃಹ, ಹುಲ್ಲಹಳ್ಳಿ, ನಂಜನಗೂಡು
ಜಗದ್ಗುರು ಶ್ರೀ ಶಿವರಾತ್ರೀಶ್ವರ ಅನಾಥಾಲಯ, ದೊಡ್ಡಕಾಡನೂರು, ಹೊಳೆನರಸೀಪುರ ತಾಲ್ಲೂಕು, ಹಾಸನ ಜಿಲ್ಲೆ
ಜಗದ್ಗುರು ಶ್ರೀ ಶಿವರಾತ್ರೀಶ್ವರ ವಿದ್ಯಾರ್ಥಿನಿಲಯ, ಕೆ.ಆರ್.ನಗರ
ಉದ್ಯೋಗಸ್ಥ ವಿಶೇಷಚೇತನ ಮಹಿಳೆಯರು ಹಾಗೂ ವಿದ್ಯಾರ್ಥಿನಿಯರಿಗಾಗಿ ಜೆಎಸ್‌ಎಸ್ ವಿದ್ಯಾರ್ಥಿನಿಲಯ, ಮೈಸೂರು
ಶ್ರೀ ಬಸವೇಶ್ವರ ಅನಾಥಾಲಯ, ಬಾಚಹಳ್ಳಿ, ಗುಂಡ್ಲುಪೇಟೆ ತಾಲ್ಲೂಕು
ಶ್ರೀ ಬಸವೇಶ್ವರ ಅನಾಥಾಲಯ, ಶಿವಪುರ, ಗುಂಡ್ಲುಪೇಟೆ ತಾಲ್ಲೂಕು
ಶ್ರೀ ಬಸವೇಶ್ವರ ಅನಾಥಾಲಯ, ವಡ್ಡಗೆರೆ, ಗುಂಡ್ಲುಪೇಟೆ ತಾಲ್ಲೂಕು

ಪಾರಂಪರಿಕ ಹಾಗೂ ಅಧ್ಯಾತ್ಮಿಕ ಜಾಗೃತಿಗೆ ಕೊಡುಗೆ

ಜೆಎಸ್‌ಎಸ್ ಸ್ಪಿರಿಚ್ಯೂವಲ್ ಮಿಷನ್ (ಯುಎಸ್‌ಎ)
ಜೆಎಸ್‌ಎಸ್ ಅಧ್ಯಾತ್ಮ ಹಾಗೂ ಸಾಂಸ್ಕೃತಿಕ ಕೇಂದ್ರ, ಸಾಕೇತ್, ನವದೆಹಲಿ

ಪರಮಪೂಜ್ಯ ಜಗದ್ಗುರು ಡಾ. ಶ್ರೀ ಶಿವರಾತ್ರಿ ರಾಜೇಂದ್ರ ಮಹಾಸ್ವಾಮಿಗಳವರು ೧೯೮೬ರಲ್ಲಿ ಅಮೇರಿಕಾಕ್ಕೆ ಭೇಟಿ ನೀಡಿದ್ದರು. ಅಮೇರಿಕಾದಲ್ಲಿ ಆಧ್ಯಾತ್ಮಿಕ ಕೇಂದ್ರವನ್ನು ಸ್ಥಾಪಿಸಿ, ಭಾರತದ ಆಧ್ಯಾತ್ಮಿಕತೆಯನ್ನು ಅಲ್ಲಿ ನೆಲೆಸಿರುವ ಭಾರತೀಯರಿಗೆ ಹಾಗೂ ಇತರರಿಗೆ ಪರಚಯಿಸುವುದು ಅವರ ಬಹಳ ದೀರ್ಘ ಕಾಲದ ಕನಸಾಗಿತ್ತು. ಜೆಎಸ್‌ಎಸ್ ಶಿಕ್ಷಣ ಸಂಸ್ಥೆಗಳಲ್ಲಿ ಕಲಿತಂತಹ ಹಳೆಯ ಹಾಗೂ ಪ್ರಸ್ತುತ ಅಮೇರಿಕಾದಲ್ಲಿ ನೆಲೆಸಿರುವಂತಹ ವಿದ್ಯಾರ್ಥಿಗಳು, ಅವರ ಕುಟುಂಬದ ಸದಸ್ಯರು ಹಾಗೂ ಜೆಎಸ್‌ಎಸ್ ಸಂಸ್ಥೆಗಳ ಭಕ್ತಾದಿಗಳ ತೀವ್ರಾಪೇಕ್ಷೆಯ ಮೇರೆಗೆ, ಶ್ರೀಮಠದ ಈಗಿನ ಮಠಾಧಿಪತಿಗಳಾದ ಪರಮಪೂಜ್ಯ ಜಗದ್ಗುರು ಶ್ರೀ ಶಿವರಾತ್ರಿ ದೇಶಿಕೇಂದ್ರ ಮಹಾಸ್ವಾಮಿಗಳವರು ಅಮೇರಿಕಾದ ಮೇರಿಲ್ಯಾಂಡ್‌ನಲ್ಲಿ ೧೯೯೯ರಲ್ಲಿ ಜೆಎಸ್‌ಎಸ್ ಸ್ಪಿರಿಚ್ಯೂವಲ್ ಮಿಷನ್ ಅನ್ನು ಸ್ಥಾಪಿಸಿದರು.

ಈಗ ಜೆಎಸ್‌ಎಸ್ ಸ್ಪಿರಿಚ್ಯೂವಲ್ ಮಿಷನ್, ಇತರೆ ಸಮಾನಮನಸ್ಕ ಸಂಸ್ಥೆಗಳ ಸಹಯೋಗದೊಂದಿಗೆ ಭಾರತದ ಶ್ರೀಮಂತ ಸಾಮಾಜಿಕ-ಸಾಂಸ್ಕೃತಿಕ ಹಾಗೂ ಆಧ್ಯಾತ್ಮಿಕ ಪರಂಪರೆಯನ್ನು ವಿಶ್ವದ ಎಲ್ಲ ಮೂಲೆಗಳಿಗೂ ತಲುಪಿಸುವ ಮಹತ್ಕಾರ್ಯದಲ್ಲಿ ತೊಡಗಿದೆ. ಧಾರ್ಮಿಕ ಪ್ರವಚನಗಳು, ಯೋಗಾಭ್ಯಾಸ ಹಾಗೂ ಪುಸ್ತಕಗಳ ಪ್ರಕಟಣೆ/ ಕ್ಯಾಸೆಟ್‌ಗಳು ಹಾಗೂ ಸಿಡಿಗಳ ಮೂಲಕ ಆಧ್ಯಾತ್ಮಿಕ ಜ್ಞಾನವನ್ನು ಜನರಿಗೆ ತಲುಪಿಸುವಂತಹ ಚಟುವಟಿಕೆಗಳನ್ನು ಕೈಗೊಂಡಿದೆ. ನಮ್ಮ ಪ್ರಾಚೀನ ಮೌಲ್ಯಗಳನ್ನು ಈ ಮೂಲಕ ಪ್ರತಿಯೊಬ್ಬರಿಗೂ ತಲುಪಿಸುತ್ತಿದೆ. ಯಾವುದೇ ಜಾತಿ, ಮತ, ಧರ್ಮ, ಸಮುದಾಯ, ವರ್ಣ, ಇತ್ಯಾದಿ ಭೇದಗಳಿಲ್ಲದೆ ಸುರಕ್ಷಿತ ಹಾಗೂ ನೆಮ್ಮದಿಯ ಜೀವನವನ್ನು ಅಪೇಕ್ಷಿಸುವ ಪ್ರತಿಯೊಬ್ಬರಿಗೂ ಸೇವೆ ಸಲ್ಲಿಸುವ ಉದ್ದೇಶವನ್ನು ಹೊಂದಿದೆ.

ನೆಮ್ಮದಿ, ಸೌಹಾರ್ದತೆಯನ್ನು ಸ್ಥಾಪಿಸಲು ಹಾಗೂ ಭಾರತದ ಶ್ರೀಮಂತ ಕಲೆಗಳು ಹಾಗೂ ಸಂಸ್ಕೃತಿಯ ಪರಂಪರೆಯನ್ನು ಪ್ರೋತ್ಸಾಹಿಸುವ ಉದ್ದೇಶದೊಂದಿಗೆ ನವದೆಹಲಿಯ ಸಾಕೇತ್‌ನಲ್ಲಿ ಜೆಎಸ್‌ಎಸ್ ಅಧ್ಯಾತ್ಮ ಹಾಗೂ ಸಾಂಸ್ಕೃತಿಕ ಕೇಂದ್ರವನ್ನು ಸ್ಥಾಪಿಸಲಾಗಿದೆ. ಈ ಕೇಂದ್ರವು ಜನರಿಗೆ ಅಧ್ಯಾತ್ಮಿಕತೆಯ ನಿಜವಾದ ಸಾರವನ್ನು ಅರ್ಥ ಮಾಡಿಕೊಳ್ಳಲು ಹಾಗೂ ಮಾನವೀಯ ಮೌಲ್ಯಗಳನ್ನು ಬೆಳೆಸಿಕೊಳ್ಳಲು ಮಾರ್ಗದರ್ಶಕ ಶಕ್ತಿಯಂತೆ ಸೇವೆ ಸಲ್ಲಿಸುತ್ತಿದೆ.